En occasiun dal di da las portas avertas han blers indigens visità l’anteriura ustaria Bahnhöfli gist dasper la staziun dal tren Trimmis/Vaz Sut. Dapi in onn datti là il center da transit. Cunzunt Afgans ma era Sirians ed Eritreans chattan qua in suttetg. Bunamain la mesadad èn giuvenils. Tiers vegnan anc bleras famiglias.
-
Bild 1 von 9Legenda: Modjtaba è ussa dapi 4 mais a Trimmis. RTR, Gian-Marco Maissen -
Bild 2 von 9Legenda: Il center da tranist Bahnhöfli a la staziun da Trimmis/ Vaz Sut. RTR, Gian-Marco Maissen
-
Bild 3 von 9Legenda: L'entrada en l'abitaziun cuminaivla. RTR, Gian-Marco Maissen
-
Bild 4 von 9Legenda: Las chombras 28 e 29 en quellas da la WG dals giuvenils. RTR, Gian-Marco Maissen
-
Bild 5 von 9Legenda: Il center da transit è sco ina gronda famiglia. RTR, Gian-Marco Maissen
-
Bild 6 von 9Legenda: L'interess d'indigens è stad grond. RTR, Gian-Marco Maissen
-
Bild 7 von 9Legenda: En il curtin han ils giasts pudì insagiar spaisas dals pajais dals abitants. RTR, Gian-Marco Maissen
-
Bild 8 von 9Legenda: La vista sin il montalin, ma era sin l'ovra dad arder rument. RTR, Gian-Marco Maissen
-
Bild 9 von 9Legenda: Dasper 40 giuvenils chattan era bleras famiglias in suttetg a Trimmis. RTR, Gian-Marco Maissen
Ina abitaziun communabla, duos chombras da durmir e diesch giuvenils
Al di da las portas avertas scumpartan giuvens, sin la terrassa sin il tetg té verd e nair sco era snacks afgans. Mintga visitader vegn beneventà cordialmain dals giuvens umens en cuschina. In dad els è Modjtaba, 18 onns ed oriund dal Afghanistan. Ensemen cun ses frar è el ussa dapi quatter mais a Trimmis. Avant èra el a Lizirüti e Tavau. Tut en tut è el ussa gia dus onns en Svizra.
Emprender tudestg, far fitness e discurrer cun ils auters
Modjtaba ha in permiss provisoric, vul dir in F. Cun quel dastgass el schon lavurar. In fufragnadi tar in mecanist d’autos ha el era gia pudì far. Quai haja plaschì bain. Dentant survegnir ina plazza saja schon pli difficil. Blers n'han betg uschè fiduzia en persunas cun in F. Perquai emprenda el ussa vinavant tudestg e sperescha d'in bel di pudair far ina scolaziun. Quai è era ses siemi. D’avair en tschintg onns ina famiglia, ina lavur ed in agen da chasa. Per il mument na saja quai dentant anc betg pussibel. Ussa va el la damaun a scola, il suentermezdi fa el in pau fitness e lura vegn discurri bler in cun l’auter. Simplamain star enturn e durmir chattia el lungurus. Quai na veglia el betg far.
A nus manca anc l'emprim plaz
Superbi han ils giuvens mess en scena ils buccals da turniers da ballape als quals ch’els han participà. Plirs segunds plaz e terzs plazs pon ins vesair. L’emprim plaz manchia anc, manegia Modjtaba. Quel vulani lura gudagnar al proxim turnier. El sez na sa betg pli dar. El s’haja ina giada fatg mal fermamain ed haja stuì chalar cun ballape. El haja ussa il fitness che saja ses sport.