Ad RTR ha Schmid ditg ch'el veglia purtar success e schlantsch al turissem grischun.Per sia nova funcziun saja in avantatg ch'el arrivia d'ordaifer il Grischun. El saja liber e possia guardar tut or d'ina perspectiva objectiva. In dals puncts ferms dal Grischun èn per Schmid las linguas e cun quai era il rumantsch. Schmid è actualmain directur da Svizra Turissem . Lezza ha communitgà che l'econom da manaschi da 54 onns bandunia Svizra Turissem per daventar independent. Schmid vul manar in'atgna agentura da marketing e surpigliar dasperas intgins mandats elegids, sco per exempel quel sco president da Grischun Vacanzas.
Friberg cuntent
Ses antecessur en uffizi, Marcel Friberg, è fitg cuntent cun questa schliaziun. Schmid saja il candidat ideal per questa sfida. Quai ha Friberg ditg sin dumonda da la gasetta «Südostschweiz».
Reacziuns maschadadas
Critica envers la designaziun da Jürg Schmid vegn dal l’hotellaria: Ernst Wyrsch, president da Hotellerie Suisse Grischun, exprima dubis, che Jürg Schmid haja, sper ses auters mandats, avunda temp per il presidi da Grischun Vacanzas. Wyrsch avess vesì pli gugent ina dunna a la testa da l’organisaziun.
Elecziun spustada
Il prim da matg 2017 avess Grischun Vacanzas atgnamain gì d'eleger la successura u il successur da Marcel Friberg. Damai ch'i n'era lura anc betg cler, cura che Schmid possia bandunar Svizra Turissem, è l'elecziun vegnida spustada sin mez zercladur 2017.
RR novitads 06:00
