Metter Andri Perl en mo in truclet – quai na va betg. Er sch'el ha sias ragischs en il rap, n'è el betg mo rapper da la band «Breitbild». Er sch'el ha scrit dus romans, diversa lirica e publitgescha regularmain columnas – n'è el betg mo scriptur. Ed er sch'el stat savens sin tribuna ed ha schizunt scrit differents tocs da teater – n'è el betg mo dramaturg.
Ed ussa vegn el onurà per tut quellas contribuziuns a la cultura e surtut la litteratura grischuna. El survegn numnadamain il Premi grischun da litteratura 2019, ch'è vegnì surdà ils 13 da favrer.
Betg part dal premi...
...mabain part dad Andri Perl è sia carriera politica. Dapi l'onn 2008 fa el part da la partida socialdemocratica grischuna – gia dus onns presidiescha el la fracziun da Cuira. E l'onn 2014 è el daventà deputà dal Cussegl grond.
Er sch'i saja mintgatant difficil da cumbinar il mund creativ ed il mund politic – tuts dus èn impurtants per el – pertge far politica mo atras ses art saja memia pauc per el.
TR Telesguard 17:40