Malgrà ch'il Sennhof è plitost vegl, stoppia la tecnica esser sin il pli nov stan, declera Ines Follador, ch'è dapi tschintg onns directura da la praschun. Perquai ch'il Sennhof saja situà amez la citad stoppian ins schizunt avair dapli tecnica da segirtad ch'èn praschuns pli modernas. Ina praschun pli moderna haja per exempel duas saivs internas, in mir ed ordador anc ina giada ina saiv. En il Sennhof haja be in mir. «Quai è memia pauc per las furmas da delict che nus avain. Per tegnair sidretg il standard da segirtad stuain nus uschia investar bler en la tecnica.» Mo uschia sappian ins cumpensar quai.
Naginas zonas verdas muort pitschnadad
Il Sennhof n'è betg mo vegl, mabain er pitschen. Uschia detti bleras sentupadas tranter ils praschuniers sezs u era dals praschuniers cun il persunal. Quai saja tant positiv sco er negativ, manegia Follador. «I na dat bunamain naginas pussaivladads da guntgir. Era ils lavurants da la praschun han pauc spazi per sa retrair.» Era per ils praschuniers na saja betg simpel: Ins na sappia betg porscher ad els zonas verdas.
Il «patrun» dals praschuniers
Ignaz Flepp è dapi 16 onns cauluvrer dalla scrinaria dal Sennhof. Damai ch' ils praschuniers na sajan betg da mastergn scrinaris, stoppia el luvrar en els pass per pass. «Ina giada ch' i èn disads poni luvrar detg bain independentamain.»
Ils singuls praschuniers cun lur istorgias emprendia el d'enonuscher. A l'entschatta discuteschia ins ed er durant la lavur sa mussian lura certs defizits. «Vida quai stuain nus lura adina puspè lavurar. Igl è fitg interessant da guardar quant lunsch ch' ins vegn da lavurar cun ina persuna.»
Savens na veglian ils praschuniers l'emprim betg lavurar e sajan plitost negativs. «Cun il temp sa laschan els lura anc sa mover in zichel», di Flepp. Ch'ils destins dals singuls praschuniers persequiteschian ses patratgs fin a chasa, saja strusch il cas. Sco quai ch' el declera «Il temp da lavur è qua en praschun. Cura ch'jau vom ora è quai puspè ton sco emblidà.»
Chastis enturn 1800 - in mund per sesez
Per il giubileum dal Sennhof vegn edì il cudesch «200 onns execuziun da chastis en Grischun», dal giurist Matthias Kuster. Aifer quai temp haja la moda e maniera da chastiar semidà fermamain, declera el.
En il Sennhof vegnevian ils delinquents be serrads en. Tuttina devi era en questa praschun modas da chastiar che sajan ord vista dad oz na betg da chapir. In exempel è il chasti da chadainas, nua ch' ils praschuniers era enchadanads di e notg. «Questa pratica era anc ditg suenter la mesadad dal 19avel tschientaner realitad en il Sennhof».
RR actualitad 08:00