Il center da famiglia Planaterra è in lieu d'infurmaziun e scuntrada a Cuira. Gia il 2011 ha el avert las portas ed occupa il mument 25 dunnas. Per il grond engaschi per il center survegnan Heidi Theus-Saxer ed Irina Domenig-Skaanes il premi DUNNA da la secziun grischuna da l'Associaziun svizra dad academicras, tenor ina communicaziun da medias da la secziun.
La prestaziun da las duas dunnas
I haja fatg impressiun co ellas «integreschan en il manaschi dunnas da differenta derivanza culturala e per part cun biografias impressiunantas», scriva l'associaziun.
Cun in premi DUNNA vegnian undradas mintga dus onns dunnas en il Grischun cun merits extraordinaris en la professiun u en uffizi d'onur. Il premi vul far visibla la lavur che dunnas prestan savens davos las culissas.
