Punct da partenza era ina expressiun da Reto Gurtner, ch'ha manegià ch'en diesch onns vegn in bigliet da di a custar 200 enfin 300 francs.
Quai fiss en la grondezza dals pretsch en l’America. Motiv per quest augment marcant sajan las investiziuns en l’infrastructura. Cun quai ch'i vegn pli chaud ston ins far dapli naiv artifiziala e quai custa. Ch'ils custs per las pendicularas s'augmentan è era cler a Markus Moser, il mainafatschenta da Corvatsch, Diavolezza e Lagalb. Ed era el pudess sa metter avant ch'in bigliet dal di custia en diesch onns in pèr tschient francs. Dentant na saja quai betg durant tut la stagiun il cas – cun ils bigliets cun pretschs dinamics pudess ins sez reglar quant ch’ins paja. E sche la dumonda restia medem gronda cun talmain auts pretschs, na po il mainafatschenta uss betg anc dir. La qualitad da la pista, da las maschinas e da la plazza per ir cun ils skis sto dentant vegnir finanziada. E quai duai er en il futur pajar il consument, pia ils giasts sin pista.
Augments da pretschs era tar territoris pli pitschens
Er il directur da las pendicularas Sursaissa Mundaun, Markus Good, spetga in augment da pretschs tar las cartas dal di. Che quellas sa dubleschan u tripleschan, quai na saja actualmain però betg realistic. Causa investiziuns en l'infrastructura ed oravant tut er en l'ennavaziun saja dentant da spetgar in augment moderà. Gist territoris da skis pli pitschens stoppian però sa differenziar er en avegnir da las grondas destinaziuns che attiran er in auter public.
Prognosas plausiblas
Dominik Knaus è expert da turissem. En la Scol’auta spezialisada dal Grischun maina el l’Institut per turissem e temp liber. Er el di che la pretaisa ch’ils pretschs èn en diesch onns tar 200 enfin 300 francs saja plausibla. Quai surtut cun ils pretschs dinamics, pia ch'i n'è betg mintga di uschè char. Sch'ina destinaziun, en quest exempel Laax, augmentass ils pretschs, lura fiss quai a curta vista in avantatg per ils auters territoris. Numnadamain giessan ils giasts lura tar els perquai ch’il bigliet fiss pli bunmartgà. A lunga vista avessan dentant era las autras destinaziun d’augmentar lur pretschs, cunquai ch'er ellas han da far pli autas investiziuns. Dentant na pensa Dominik Knaus er lura betg che mintga territori da skis vul vender ils bigliets per in tal pretsch. Per exempel territoris da skis per famiglias n'avessan d’avair nagin interess da pretschs uschè auts.
