La radunanza communala da Breil ha approvà il preventiv da l'onn che vegn. Quel quinta cun in gudogn da 805'761 francs tar entradas totalas da passa 15,9 miliuns francs ed expensas da passa 15,1 milliuns francs.
Plinavant han ils da Breil decidì da schliar la corporaziun setgentera da gliet Cadi. Ina raschun sajan las emissiuns da friads che sajan s'augmentads considerablamain per ils vischins, uschia ch'i ha dà adina dapli reclamaziuns. La radunanza da delegads da la Corporaziun setgentera da gliet Cadi ha decidì en la radunanza dals 16 da fevrer 2023 per mauns da las vischnancas cumpigliadas, da chalar cun setgentar il gliet da las sereneras Cadi a Zignau e da furnir il gliet a la TRAC a Cuira.
Dapi la primavaira 2003 è la setgentera solara da gliet Cadi a Zignau en funcziun e setgenta il gliet da las sereneras da Sedrun, Mustér, Curaglia, Zavragia (Sumvitg/Trun) e Sorts (Breil).
Er ulteriuras vischnancas che fan part da la corporaziun decidan anc a lur radunanzas communalas davart la setgentera.
