Il Blue Cinema a Cuira na para betg d'esser in kino classic, el para plitost sco in center da divertiment. Era in onn suenter l'avertura vegnan bleras persunas anc adina en il kino. Blers e bleras vegnan dentant era pervia dad autras purschidas ch'i dat. La bar da sport para dad esser fitg populara, nua cha blers s'entaupan cun amias ed amis per baiver ina gervosa, giugar bigliard e guardar in gieu da ballape ubain per ir a mangiar en il restaurant sin la terrassa da tetg.
Il CFO da Blue Cinema Grégoire Schnegg è pli che cuntent cun l'onn passà dal kino a Cuira. Lur aspectativas sajan vegnidas ademplidas ed era il budget giaja si. Tenor el saja in motiv per il success era ch’els han in vast mix da purschidas che paran da plaschair al public. Els mettan era blera paisa sin spiertas sper il kino classic, per exempel livestreams da gieus da ballape u da concerts. Insatge fitg spezial saja era il rooftop cinema ch’els hajan dapi il settember, in kino nua ch’ins po esser en il restaurant sin la terrassa dal tetg e guardar in film sin ina gronda taila da kino.