I fa bell'aura, bleras e blers van en las muntognas. Ins prenda cun ina buna marenda e buttiglias. Sche quellas èn vidas chatt'ins segir ina funtauna per emplenir quellas cun aua frestga.
Pon ins baiver tut l'aua?
D'emplenir la buttiglia cun aua d'ina funtauna en vischnanca na saja nagin problem. Quella aua saja gustusa, declera il chemicher Otmar Deflorin. La raschun è che quellas funtaunas vegnan controlladas regularmain.
Attenziun dovri però d'emplenir la buttiglia en las muntognas. Uschia cusseglia Otmar Deflorin da betg stizzar la said cun aua tar funtaunas per animals. Savens han talas funtaunas in uder da gumma.
Ord funtaunas, en in territori nua ch'animals èn vid pascular, na pon ins betg baiver.
L'aua clera e frestga en ils culms fetschia ina faussa parita. Gist tal'aua possia cuntegnair bacterias ch'ins na vesa betg, per exempel uschenumnadas bacterias fecalas, enconuschentas sco salmonellas. Quellas pon chaschunar mal il venter, schlet u fevra.
Utensils per tuttina baiver l'aua
Ins sa prender cun ins in apparat per buglir si l'aua e suenter pon ins baiver quella. I dat er buttiglias cun filters spezials, che filtrescha las bacterias.