Attenziun cun pavlar utschels - Damain è dapli

Blers utschels sgolan vers sid subit ch'i vegn fraid. Il motiv è simpel, il pavel manca. Blers utschels sa nutreschan numnadamain en emprima lingia dad insects. Sco che Sergio Wellenzohn, ornitolog da l'Uffizi da chatscha e pestga grischun, declera è quai tar ils utschels che restan qua l’enviern in zic auter. Quests utschels sa nutreschan per gronda part da fritgs da plantas sco per exempel sems. I dat er utschels che mangian la stad insects e midan l’enviern sin sems per surviver la mancanza d’insects. Els sajan profis da chattar pavel er cun blera naiv e grevs envierns. Il pli grev han ils utschels giuvens che n'han betg tanta experientscha sco ils vegls.

Inqual utschel d'enviern

Atgnamain vegnan ils utschels er senza noss agid tras l’enviern, ma Sergio Wellenzohn di che vulair gidar in zic saja natiralmain permiss. I dat però in pèr puncts impurtants da resguardar per na betg far donn als utschels. In aspect è il dretg pavel. Rests da mangiar n'èn betg adattas per pavlar als utschels. Il meglier è da dar pavel natiral sco sems da flurs sulegl. Er èn urden èn differentas nuschs u nitscholas. Qua saja impurtant da rumper si ellas in zic, cunquai ch'ils utschels na pon quai betg far.

In auter aspect è l'igiena da la chasina d’utschels. Ina chasina attira blers utschels che fissan uschiglio sin in territori pli grond. Uschia è il privel da malsognas pli grond. Ellas pon uschia sa derasar fitg spert. Ina maniera per evitar quai è da pavlar ils utschels be d’enviern cura ch'igl è propi fraid. Pli fraid ch'igl è e pli pauc sa derasan las malsognas. L'ornitolog Sergio Wellenzohn cusseglia da be pavlar ils utschels sche la cuntrada es propi cuvernada cun naiv. En pli dettia chasinas d'utschels specificas che pon far la differenza. I as tracta da chasinas che tegnan sitg il pavel. Ellas èn però er construidas uschia ch'ils utschels na vegnan betg da far puglinas en il pavel. Uschia resta il pavel net ed igienic.

Or da l'archiv