Advent - Scriver cartas da Nadal: fa quai anc insatgi ?

I va vers Nadal. Quai vul dir era per la posta sa semtgar. Normalmain transporta la posta radund 600’000 pachets al di, ma uss èn quai var 60% dapli. Ils dis ils pli ferms il december transporta la posta schizunt fin in milliun pachets. Pervi da quai emploieschian els 500 collavuraturs e collavuraturas temporaras, ha ditg il pledader da medias da la posta, Stefan Dauner. Era las maschinas che sorteschan ils pachets en ils centers da la posta lavuran dapli uras che normalmain. Tranter auter vegnan era organisadas passa 350 turas dapli per manar e retrair pachets en tut la Svizra. Tut questas mesiras dovria quai il december dumagnar l'augment dad empustaziuns e spediziuns dals pachetins. Sch'i dat in augment er da cartinas è grev da dir, perquai che quellas sa maschaidan cun brevs e na vegnan betg dumbradas spezialmain.

Ils bambins da la posta

Insatgi che scriva anc brevs èn ils uffants che tramettan glistas da giavischs ch'èn adressadas al Son Niclà u a l'anghel da Nadal. Dapi ils onns 50 ha la posta sa fatg en che uffants tramettan lur giavischs per Nadal sin posta. Suenter ponderaziuns ha la posta perquai decis da respunder a tut questas cartas. Ils davos onns eran quai circa 30’000 cartas mintg'onn. Las respostas vegnan dad otg bambins da la posta che han l’incumbensa da guardar che mintga uffant survegn ina resposta persunalisada. Per che quella resposta arriva er al dretg lieu, na dastg'ins betg emblidar da scriver si l’adressa.

Terapia creativa: zambregiar cartinas da Nadal

RTR è stà sin visita tar insatgi che fa anc mintg'onn sez cartinas da Nadal. Joëlle Carigiet ch'abita dasper Lucerna ha ina passiun da zambregiar e crear chaussas creativas. Ella fa tranter auter er differentas cartinas. Per far questas cartinas dovr'ins da tutta sorts material sco fegls da colur, bindel da tatgar, cola, ina forsch, colurs e traglischur. Sper tut quest material ha ella er ina maschina per tagliar fegls ed in plotter. Cun il plotter sa laschan squitschar motivs en il palpiri.

Sper cartinas fa Joëlle Carigiet anc bler auter, sco cuser, far cun stgaina u cun il crutsch, zambregiar e pitturar. Per ella èn er cartinas da Nadal fatgas sez e scrittas persunal insatge che ella carezza e schazegia fitg. Ella spera ch'i vegn a dar cartinas fatgas sez era en l'avegnir e betg be salids da Nadal digitals via messadi u sumegliant.

Per cumenzar prenda Joëlle Carigiet ils fegls che plaschan ad ella e taglia quels sin la dretga grondezza. Alura tscherna ella motivs per squitschar sin il palpiri u per laschar tagliar ora. Ella metta ensemen ils differents palpiris ed agiunta anc traglischur. Savens scriva ella anc si in curt versin sin la carta. Per part èn ils versins per rumantsch e per part per tudestg, ma in versin sin mintga carta è insatge che plascha a Joëlle Carigiet. Per ella è far chaussas creativas sco cartinas da Nadal ina sort terapia. Cun laschar viver la creativitad e laschar passar in pau ils patratgs ed il stress dal di, chatta ella calma.

Or da l'archiv: