Avant in'emna ha la scola da recrut da stad cumenzà. En la caserna a Cuira e Son Gliezi èn circa 710 schuldads staziunads. Da quels han 520 recruts fatg lur emprims pass en direcziun vita militara. Pervia dal coronavirus ha l’armada dentant stuì prender mesiras. Tranter auter è ina mascrina durant tut il temp obligatorica.
-
Bild 1 von 10Legenda: Il colonel da la scola da recrut d'infantaria Daniel Steiner emprova da porscher als recruts ina scola da recruta normala. RTR, Lukas Quinter. -
Bild 2 von 10Legenda: Sa preparar per spustar. RTR, Lukas Quinter.
-
Bild 3 von 10Legenda: Ils recruts taidlan tiers als cumonds da litinent. RTR, Lukas Quinter.
-
Bild 4 von 10Legenda: L'emprims exercizis cun l'arma. Tranter auter èsi impurtant co i è da purtar la buis. RTR, Lukas Quinter.
-
Bild 5 von 10Legenda: Il sergent guarda sche la channa da l'arma è schubra. RTR, Lukas Quinter.
-
Bild 6 von 10Legenda: Era il cader da l'armada emprenda da surprender responsabladad per ils recruts. RTR, Lukas Quinter.
-
Bild 7 von 10Legenda: Era l'entrada da la caserna a Cuira vegnan las reglas d'igiena resguardadas. RTR, Lukas Quinter.
-
Bild 8 von 10Legenda: Per l'armada datti in agen concept da schurmetg. RTR, Lukas Quinter.
-
Bild 9 von 10Legenda: Mintgin sa protega dal coronavirus. La mascra è obligatorica. RTR, Lukas Quinter.
-
Bild 10 von 10Legenda: En la sala da teoria emprendan ils recruts co far guardia. RTR, Lukas Quinter
Test da corona
Tar l’entrada da servetsch han ils recruts stuì far in test da corona, declera il colonel Daniel Steiner da la scola d’infantaria a Cuira. Fin ch’ins ha ils resultats ston tut ils recruts restar en caserna – quai vala er per l’emprima fin d’emna. Sch’ils recruts dastgan turnar a chasa la segunda fin d’emna n’è betg anc cler. Quai saja impurtant per garantir ch’il virus na vegnia betg importà en la caserna.
Pliras mesiras per la segirtad dals recruts
Per garantir la meglra protecziun pussaivla ston ils recruts purtar ina mascrina blaua da protecziun – e quai durant tut il temp. Durant ina ura da sport declera Tim Andri da Müstair:
Chaminar cun la mascrina è fitg stentus. Cunzunt ils davos dis, cura ch’igl è stà chaud.
E tuttina chapescha el la situaziun. Suenter in temp sa disan ins vid la mascra. Il fatg ch’el sto restar en caserna sur la fin d’emna n’è betg in problem per el. El manegia che blers recruts hajan chapientscha per la situaziun.
Mesiras tut a dubel
La protecziun dals recruts ha la pli gronda prioritad, declera il colonel Daniel Steiner. Ins haja installà staziuns per dischinfectar ils maun. Vinavant stoppia il chau-secziun resguardar che la distanza tranter ils recruts vegnia tegnida en.
Nus empruvain da porscher ina scola da recruta normala – simplamain cun dapli distanza e mascra.
Era durant la tschaina ed il gentar dastgan be mintgamai dus recruts seser vid ina maisa. Ultra da quai vegnan ils recruts tar la recepziun ed en cuschina protegids cun in vaider da plastic.
En direcziun da daventar in um
Per ils recruts rumantschs Christian Toutsch, Flavio Gottschalk e Tim Andri hai num sa disar vid la vita militara. En l’armada sajan ins per part sur sasez.
En l’armada n’è la mamma betg denturn.
Tuts sajan dentant cuntents cun lur sergents e litinents. Els dettian cumonds clers, hajan dentant era chapientscha, sch’ins fa anc sbagls l’entschatta. Per exempel tar il «s’annunziar» u sch’i va per l'emconuschientscha dals differents grads militars. Percunter plaschan a tuts ils exercizis cun l’arma persunala. Suenter l’emprima emna fan els ina buna bilantscha e sa legran sin ils proxims mais.