Ils experts chantunals èn optimistics da pudair allontanar l'avrigl in toc grip instabil tar l'access a Buseno, scriva l'Uffizi da construcziun bassa dal Grischun. Premissa saja dentant che la segirtad dals lavurers saja garantida.
Gia dapi il cumenzament da l'onn planisescha il chantun in rempar da protecziun tar il spartavias da Buseno, e l'installaziun da raits da protecziun per proteger il plazzal. Questas lavurs duain era succeder anc quest onn.
Vitiers evaluescha il chantun dapi l’atun 2023 la situaziun da plirs grips instabils, en la paraid-crap ch’è 300 meters auta sur la via da Calanca. Las lavurs en quests lieus vegnian a durar almain fin l’onn proxim, scriva il chantun. Fin che las emprimas lavurs èn realisadas la primavaira che vegn, stoppia ils abitants e las abitantas da la val quintar en cas excepziunals cun bloccadas da la via a curta vista.
Mesiras a lunga vista
Parallel evaluescha il chantun la pussaivladad da segirar la via a lunga vista cun in tunnel. Per cuntanscher ina segirtad optimala stuess quel esser radund 1,4 kilometers lung. Per realisar tals projects quinta il chantun en la regla cun in orizont da passa 10 onns. Fin lura sajan necessarias ulteriuras mesiras, ch’il chantun possia realisar pli spert.
