Durant in’emna survegnan uffants tranter 9 e 13 onns la pussaivladad da scuvrir il mund da MINT (matematica, informatica, scienzià natirala e tecnica). Organisada vegn quell’emna da project da la scol'auta da pedagogia dal Grischun ensemen cun interpresas da l’economia. Quai ch'aveva avant 10 onns cumenzà cun in di da MINT –nua che 24 uffants ed ina suletta interpresa avevan fatg part – è ussa sa sviluppà tar in'entira emna da MINT cun 200 uffants e 16 interpresas. L'interess para gronds ed el para da crescher.
Mintg’onn vulan dapli interpresas sa participar. Quest onn è quai tranter auter Thomann Nutzfahrzeuge a Cuira. Claudio Beltrami – responsabel per ils emprendist e las emprendistas da Thomann Nutzfahrzeuge – declera che quella purschida gidia tranter auter da cumbatter la mancanza da persunal qualifitgà. Vinavant declara el ch'il project saja era ina buna experientscha per lur emprendists. Lezs possian uschia dar in'invista en lur mintgadi da professiun als uffants.
Lilian Ladner, manadra dal post spezialisà da MINT da la scol'auta da pedagogia, è fitg cuntenta co l'interess davart MINT saja creschì. Era futurs scolasts e scolastas sappian profitar da quell'emna da project. Lez sappian per exempel gudagnar dapli savida per la didactica dals roms da quella sparta.
...che la scolaziun e l’economia pon vinavant cooperar ensemen. Pertge mo ensemen essan nus ferms e pudain profitar in da l’auter.
Sguard en il futur
Sper la scol'auta da pedagogia porschan er autras instituziuns camps da MINT per uffants, per exempel la scol'auta spezialisada FHGR. I dettia intginas cooperaziuns e barats cun la FHGR, dentant manchia actualmain anc ina tscherta organisaziun da tetg che coordinescha las differentas purschidas. Qua hajan els potenzial da crescher. Vinavant giavischa Lilian Ladner ch'anc dapli interpresas – forsa perfin er or d'autras branschas – fetschian part a l’emna da project MINT.
