La societad GRdigital ha surpiglià l’incumbensa dal chantun da promover la digitalisaziun en il Grischun. Per questa finamira ha il Cussegl grond numnadamain mess a disposiziun 40 milliuns francs.
Tgi survegn daners?
La lezia da la societad è da bajegiar ina punt tranter ils iniziants ed il chantun. GRdigital survegn dumondas dad iniziants ed examinescha ils projects sin basa da lur lescha e premissas. La societad dat vinavant ina recumandaziun al chantun, sche quest project duai survegnir sustegn finanzial. En lur emprims projects gioghia la lingua ina gronda rolla, l'intelligenza artifiziala e martgads digitals, di il president da GRdigital, Jon Erni.
Il prim pass impurtant è da rabitschar tras ils projects, nus essan curt avant pudair far quai.
In gremi d’experts da GRdigital valitescha ils projects. Quai saja ina gruppa da quatter persunas e tut tenor project vegnan vitiers persunas dal fatg externas. Impurtant saja che las persunas che valiteschan ils projects sajan neutralas e n'hajan nagina relaziun culs iniziants.
Nus piglian persunas spezialisadas che n'èn betg pertutgadas, uschia ch'ellas pon decider neutral.
