La cumissiun da l’UE ha autorisà il vaccin Imvanex encunter la virola da schimgias. Il medicament da l’interpresa Bavarian Nordic vegn gia ozendi duvrà encunter la virola umana. Divers stadis avevan perquai gia acceptà da nizzegiar il medicament per il nov diever. Uss vala la lubientscha per tut ils 27 stadis da l'UE sco era per l’Islanda, il Liechtenstein e la Norvegia. En ils Stadis Unids è il preparat admess cun il num Jynneos.
Virola umana
«Orthopoxvirus variolae» è in virus fitg malsegir per umans, 10-90% mortals. Cun ina campagna da vaccinaziun ha l'Organisaziun mundiala da sanadad WHO pudì extirpar questa varianta ils onns 1970.
Questa virola umana n'èsi betg da scumbigliar cun la virola selvadia che sa mussa cun pitschnas borlas sin la pel, surtut tar uffants.
Virola da schimgias
«Orthopoxvirus simiae» u era Monkeypox virus MPXV infizescha oriundamain divers ruiders e sco accident era schimgias ed umans. La malsogna è pli miaivla che la virola umana.