Diesch millis persunas èn sa radunadas sin la plazza da Son Peder a Roma, nua che Papa Francestg ha tegnì ses pled tradiziunal da Nadal. En quel ha el clamà a pasch en il Proxim Orient e che las operaziuns militaras cun consequenzas sgarschaivlas per persunas civilias prendian ina fin. Il parsura da la baselgia catolica ha er admonì a pasch en autras regiuns da conflict sco l'Ucraina, la Siria u la zona da Sahel. El ha er condemnà las fatschentas da l'industria d'armament.
Suenter ses pled ha Papa Francestg dà la benedicziun «Urbi ed Orbi», pia per la citad ed il mund a passa 1,3 milliardas catolicas e catolics. Gia en la messa da Nadalnotg aveva Papa Francestg fatg attent a destin dals umans en il Proxim Orient.
Sper ils pleds davart las regiuns da conflict ed ils patratgs per las persunas pertutgadas ha il papa er fatg ina cumperegliaziun cun abort. I dettia sin quest mund bleras mazzacras envers innocentas ed innocents, uschia er en il venter da la mamma. Papa Francestg è enconuschent sco adversari d'aborts.
![Schweizer Garde bei Weihnachtsansprache des Papstes](https://www.rtr.ch/static/cms/images/960w/59172d.jpg)
Ord da l'archiv
Tranter ils commembers da la guardia papala èn actualmain er dus gardists rumantschs. Quai èn Diego Marcello Muolo da Scharigna e Livio Niedermann da Domat.