L'Uniun europeica ha ordinà in chasti da 1,8 milliardas euros cunter l'interpresa da tecnologia Apple. L'UE renfatscha al concern american d'avair malduvrà sia posiziun dominanta al martgà.
I va per l'App-Store sin telefonins e tablets dad Apple ed applicaziuns da musica. Apple haja impedì ch'utilisaders en las apps hajan pudì s'infurmar davart abunaments pli bunmartgads. Quai saja tenor il dretg da cartel da l'UE illegal.
Tras quai hajan consumentas e consuments probablamain pajà memia bler per abos da streaming, ha ditg il cumissariat da concurrenza da l'UE. Apple ha crititgà il chasti da milliardas e vul agir giuridicamain encunter.