L'Egipta e la Tirchia vulan meglierar lur relaziuns diplomaticas e puspè trametter ambassadurs en l'auter pajais. Quai capita suenter onns, nua che las relaziuns bilateralas èn stadas sin glatsch. La dispita era escalada 2013 suenter che la Tirchia aveva numnà la destituziun dal president egipzian da lezza giada Mohammed Mursi in «putsch dal militar».
Plinavant datti conflicts tranter ils dus pajais. Ellas han sustegnì en la guerra en la Libia differentas partidas. Ed en la mar mediterrana sa scognan ellas per ieli sutterran.
Puspè pli stretgas relaziuns diplomaticas
Uss han ils dus pajais decidì da puspè trametter ambassadurs tar in l'auter, ed uschia meglierar las relaziuns. Quai han ils presidents Recep Tayyip Erdogan ed Abdel Fattah al-Sisi decidì. Quai suenter ch'Erdogan ha gudagnà l'elecziun decisiva. Erdogan è vegnì elegì per la 13avla giada sco president da la Tirchia, ha ditg il schef da l'autoritad d'elecziun ad Ankara.
Erdogan ha gudagnà elecziun
Il president en uffizi ha fatg la cursa cunter ses adversari Kemal Kilicdaroglu. Quai cun passa 52% da las vuschs. Erdogan sez aveva gia declerà sia victoria avant che tut las vuschs eran dumbradas ora. Avant ses aderents ad Istanbul ha el engrazià a tut quellas e quels ch' hajan pussibilià ad el dad er reger ils proxims tschintg onns. Erdogan è gia dapi 20 onns a la pussanza en Tirchia.
Gratulaziuns da l'exteriur
Gratulaziuns per sia reelecziun hai dà da l’entir mund, tranter auter dal president american Joe Biden, dal president franzos Emmanuel Macron e dal president russ Wladimir Putin. Er il secretari da la Nato, Jens Stoltenberg, e la presidenta da la cumissiun da l’UE, Ursula von der Leyen, han gratulà.
