Pli pauc che duas emnas suenter che l'Israel ha cumenzà a vaccinar cunter Covid-19 èn gia bunamain in milliun burgaisas e burgais vaccinadas. Il minister da sanadad Juli Edelstein ha communitgà, che 950'000 israelianas ed israelians hajan survegnì l'emprima dosa dal vaccin , quai è dapli che 10% da la populaziun da radund 9,3 milliuns abitants. La mira saja da vaccinar 5,5 milliuns persunas per pudair franar la pandemia.
Nagin auter è uschè spert
Dapli che 40% da las persunas sur 60 onns han survegnì il prim vaccin da BionTech-Pfizer. Tenor experts da l'universitad dad Oxford n'è nagin auter pajas usché spert cun vaccinar sco l'Israel.
