Ils schefs da stadi e da regenza dals stadis G7 vulan sa cussegliar areguard la situaziun en l’Afganistan. L’inscunter duai avair lieu l’emna proxima a moda virtuala. Il president american Joe Biden ed il primminister da la Gronda Britannia, Boris Johnson hajan decis quai al telefon. Quai ha communitgà la Chas’alva a Washington.
Tema da l’inscunter digital duai esser da chattar ina strategia cuminaivla per far frunt a la crisa en l’Afganistan. I saja necessari ch’ils alliads sa coordineschian cuntinuadamain en la politica davart l’Afganistan. Il medem valia er per pussaivladads da sustegnair fugitivs dal pajais. Entant ha la Gronda Britannia annunzià da vulair prender si 5’000 fugitivs. Quai ha annunzià il minister da l’intern a Londra. Cunzunt dunnas, mattatschas ed aderents da minoritads religiusas duajan survegnir asil. A lunga vista possia la Gronda Britannia prender si enfin 20’000 fugitivs.
Ord l'archiv