Il primminister dal Cosovo Albin Kurti ha suttastritgà l'impurtanza dal sustegn da la Svizra per ses pajais. Il Cosovo veglia daventar commember dal Cussegl d'Europa l'onn che vegn – e perquai dovria el il sustegn da la Svizra, ha ditg Kurti a la gasetta «NZZ» suenter in inscunter cun il president da la Confederaziun Alain Berset. Betg tut ils stadis che renconuschan la republica dal Cosovo, sco per exempel ils stadis «Brics» (Brasilia, Russia, India, China, Africa dal Sid). Perquai dovria il Cosovo tut il sustegn pussaivel.
Confederaziun sincerescha da sustegnair ed appellescha da cooperar
La Svizra sustegnia la finamira dal Cosovo, communitgescha il Departament federal da l'intern suenter l'inscunter. Cun la commembranza survegnissan tut las abitantas ed ils abitants dal Cosovo – era la minoritad serba – access al Tribunal europeic dals dretgs umans a Strasbourg. Suenter l'inscunter ha il cusseglier federal Alain Berset appellà al Cosovo ed a la Serbia da metter en pratica las cunvegnas da Brüssel ed Ohrid. Cunvegnas che duain gidar a normalisar las relaziuns tranter ils dus stadis.
Puspè violenza en il Cosovo dal Nord
Dus dis suenter l'inscunter hai puspè dà cumbats gravants en il Cosovo dal Nord, nua che surtut persunas serbas abiteschan. Il Departament federal da l'exteriur ha silsuenter condemnà las attatgas sin la polizia cosovara ed appellà a paus e ruaus. Ils responsabels saja quai da far star bun per quests acts da violenza.