Sutmarin Titan - Pertge interessescha quai pli fitg ch'autras tragedias?

Pertga survegn questa tragedia uschia blera attenziun, cumpareglià cun autras tragedias pli grondas? La disgrazia da la «Titan» ha in caracter da raritad. Tals eveniments na capitan quasi mai. Igl è in pau sco esser a kino. Ins sa far nagut ed ins ha nagina responsabladad. Ins smina tge che vegn a capitar, ma ins spera sin ina miracla, ch’i dettia in erox u in'eroxa e che tut finescha bain. Sco en in film.

Tar autras catastrofas sco sch’ina bartga da migrantas e migrants disgrazia u ina catastrofa che capita pervia da la midada dal clima, giogan savens er chaussas politicas ina rolla. Ins po alura avair conflicts interns cun l'atgna tenuta morala. Uschia sa declera il filosof Yves Bossart, redactur e moderatur Sternstunde Philosophie SRF, la situaziun. E perquai pruvain nus probablamain pli savens da guntgir talas novitads.

Dapli unfrendas, main cumpassiun

Vitiers vegn ch’ins s’interessescha per regla dapli per destins persunals, che per destins da fullas da glieud. Per quel fenomen datti perfin in num «compassion fade». Quai munta che la cumpassiun sa sminuescha, cun il crescher dal dumber d’unfrendas. A quella conclusiun vegn tranter auter il psichiater american Robert Jay Lifton. E quel effect sa mussa tant tar donaziuns ad organisaziuns umanitaras, sco er tar il dumber da clics en las medias.

La rolla da las medias

Per las medias datti tar tals eveniments bler da raquintar. Chaussa che n'èn fin ussa anc mai vegnidas raquintadas uschia. La cumplexitad da la tschertga, la tecnica, las finanzas e las persunas ch'han ina fatscha e n’èn betg anonimas sco tar catastrofas pli grondas. Ed alura cumenza in mecanissem da medias che vegn intensivà cun las medias socialas e schurnalissem online. Grondas chasas da medias mundialas rapportan da l'eveniment, e perquai ch'ina dad ellas plazzescha il cuntegn il pli prominent fan las autras il medem. Las consumentas ed ils consuments cliccan sin las novitads ch’èn plazzadas il pli sisum perquai ch'ellas pensan che quai saja il pli impurtant. Uschia van ils dumbers da clics en l’autezza, tge che conferma a las chasas da medias d’avair fatg la dretga priorisaziun. E tut quel travasch vegn mantegnì uschia ditg ch’i dat insatge da raquintar.

Quai è chapità

La gievgia passada ha in vehichel sutmarin teleguidà chattà il cugn davos dal sutmarin sparì. La tocca sa chatta stgars 500 meters dal vrac da la Titanic al funs da la mar. Cun quai è spert stà cler, ch’i na dettia schanzas da surviver pli per ils sparids. Quai ha communitgà il schef da la guardia da costa dals Stadis Unids, John Maguer. En tut sajan tschintg tocs gronds vegnir chattà. Quai sajan stads indizis che la chombra da pressiun saja collabada.

L’implosiun

Tar il mument da l’implosiun na sa la guardia costala dals Stadis Unids betg di dapli. Las boia da sonar n’hajan betg constatà in eveniment catastrofal en las davosas 72 uras. Medias americanas rapportan dentant, ch’in sistem d’identificaziun sutmarin acustic da la marina dals Stadis Unids haja gia registrà l’implosiun la dumengia.