Suenter ch'il primminister talian Mario Draghi ha annunzià gievgia avant il parlament ch'el vul demissiunar, ha il president dal stadi Sergio Mattarella uss acceptà la demissiun. Entant ha Mattarella schlià il parlament. El ha suttascrit in decret correspundent.
Uschia elegia l'Italia pli baud che planisà in nov parlament. Atgnamain fissan las elecziuns pir stadas la primavaira 2023. Il nov termin per l'elecziun è ils 25 da settember.
Mesemna ha Mario Draghi bain anc gudagnà ina votaziun da confidenza en il parlament. Dentant n’han ses trais partenaris da coaliziun ils pli impurtants betg fatg part da la votaziun. Draghi ha gia ordavant fatg cler ch’el na vegnia betg a reger senza il sustegn da la Lega, la Forza Italia ed il Movimento Cinque Stelle. Gia l’emna passada aveva Draghi fatg amogna sia demissiun. Lura aveva il president dal stadi Sergio Mattarella dentant refusà quella.