L'Iran ha concedì d'avair sajettà giu la mesemna passada per sbagl l'aviun da passagiers ucranais. Sco l'armada iranaisa ha declerà, haja ella cret che la maschina saja in aviun d'inimi. I sa tractia d'in disdir uman.
Il minister da l'exteriur da l'Iran, Mohammad Dschawad Sarif, ha dà la culpa per part er als Stadis Unids. Quels sajan responsabels per l'atmosfera tendida, ch'haja la finala manà al disdir uman, ha il minister communitgà via Twitter. L'emna avant avevan ils Stadis Unids laschà mazzar il general iranais Soleimani dad ina drona.
Curt avant che l'aviun da persunas era crudà giu, aveva l'Iran fatg pliras attatgas cun rachetas sin duas basas militaras en l'Irac che vegnan nizzegiadas dals Stadis Unids.
La Boeing 737 ch'era da viadi en la chapitala ucranaisa Kiew era crudada giu la mesemna passada curt suenter la partenza a Teheran. Tar il crash eran mortas tut las 176 persunas a bord da l'aviun. Ils Stadis Unids, Canada e la Gronda Britannia avevan ultimamain gia speculà, che l'aviun saja vegnì sajettà giu. Enfin uss avev l'Iran dentant adina snegà quai.
L'Ucraina pretenda indemnisaziuns
Entant ha il president da l'Ucraina, Wolodymyr Selenski, appellà a l'Iran da far star bun ils responsabels e da pajar indemnisaziuns. Questa damaun na saja betg stada buna, ma almain haja ella purtà la vardad a la glisch, ha Selenski scrit la sonda en damaun sin facebook.
El spetgia da l'Iran in cler confess da culpa ed ina perstgisa uffiziala sur chanals diplomatics. Plinavant duain ils corps da las unfrendas vegnir transportads en lur patria.
Ord l'archiv da SRF:
RTR novitads 06:00
