-
Bild 1 von 4Legenda: La catedrala Saint-Pierre e Saint-Paul a Nantes ha ars oz a bun'ura. Reuters -
Bild 2 von 4Legenda: Reuters
-
Bild 3 von 4Legenda: Reuters
-
Bild 4 von 4Legenda: Entant haja la polizia pudì retegnair il fieu. Keystone
Il donn pertutgia sur tut la grond'orgla, ha communitgà il cumandant dals pumpiers. Quella paria dad esser destruida cumplet. La plattafurma sin la quala l'orgla stettia, na saja betg stabila e pudess crudar ensemen. Tenor indicaziuns da medias sajan passa 100 pumpiers stads en acziun.
En in video dals pumpiers è stà da vesair co il fim nair è s'auzà da las fanestras da la fatschada. Davos las fanestras eran da vesair flommas. Ils pumpiers avevan serrà giu il quartier.
Polizia investighescha
La procura publica è uss vid intercurir il cas pervi da incendiament. Il fieu saja numnadamain rut ora en trais lieus, ha declerà il procuratur public da Nantes, Pierre Sennes a l'mettur da radio local. Quai na possia betg esser casualitad. In fieu saja rut ora tar l'orgla e dus ulteriurs dretg e sanester da la nav da la baselgia.
Incendi sveglia regurdientschas
La catedrala è deditgada als apostels Pieder e Paul ed è da l'epoca la gotica tardiva franzosa. L'incendi sveglia regurdientschas a l'incendi da la catedrala Notre-Dame a Paris che ha era brischà avant passa in onn. Il 2015 ha in incendi destruì il tetg d'ina autra basilica. Lez incendi ha da quai temp destruì grondas parts da la tetgaglia da la baselgia Saint-Donatien.