In helicopter da la firma Heli Austria è crudà giu en l'Italia dal nord. Quai rapporta l'ORF. L'accident è succedì mardi saira en Lumbardia en Valgerola sin 1'700 meters autezza. Trais persunas èn vegnidas feridas per part grevamain.
Pilot svizzer or da privel
Sco quai ch'ils pumpiers han confermà a l'agentura da novitads APA, è il pilot svizzer vegnì transportà en in stadi critic en l'ospital da Bergamo. L'um da 62 onns na saja entant betg pli en privel da vita, sto dentant vegnir tractà vinavant pervia da blessuras dal chau e fracturas.
Tenor il mainagestiun da Heli Austria Roy Knaus è il Svizzer cun 11'000 uras da sgol in pilot cun blera experientscha. Il stadi dals dus gidanters da sgol talians ch'eran er a bord dal helicopter na chaschunia nagins quitads. Er els vegnian tractats en l'ospital.
Il helicopter per tschintg persunas dal tip Airbus H-125 era partì il mardi or da la cuntrada muntagnarda da Livigno ed era sin viadi vers Caiolo en la provinza lumbarda da Sondrio cur ch'el è crudà en la stgiraglia. Las lavurs da salvament èn stadas difficilas cunquai ch'il territori è grev da cuntanscher. La raschun da la crudada sto anc vegnir eruida.