En l’Iran è il president Ebrahim Raisi mort tar in accident cun in helicopter. Quai rapportan las medias statalas. Las forzas da salvament hajan chattà oz en damaun il vrac da l'helicopter en il nord dal pajais. Quel valeva dapi ier sco sparì.
Schlett’aura haja engrevgià las lavurs da salvament en la regiun muntagnarda. En tut sajan 9 persunas stadas a bord; dasper il president er il minister da l’exteriur, Hossein Amir-Abdollahian. Daco ch’il helicopter saja crudà giu, na saja anc betg cler. Raisi saja stà sin via a chasa, suenter ch’el haja inaugurà in mir da serra ensemen cun ses collega d’uffizi da l’Aserbaidschan, Ilham Aliyev.
Qua è il helicopter probablamain crudà: L'incident è tgunsch capità en vischinanza da la citad da Jolfa en l'Iran dal Nord sin il cunfin cun l'Aserbaidschan. I sa tracta para d'ina regiun da guaud muntagnarda.
Pajais en la crisa
Suenter la mort dal president smanatscha a l’Iran ina crisa politica. Tenor protocol maina il vicepresident Mohammed Mochber vinavant las fatschentas da la regenza – e quai sco primminister. Tenor constituziun stoi dar entaifer 50 dis novas elecziuns.
Gia ier saira ha il manader da revolziun, Ayatollah Ali Chamenei, sincerà che las fatschentas da la regenza na vegnian betg disturbadas dals eveniments actuals.
Ebrahim Raisi è vegni saramentà l’avust 2021 sco nov president da l'Iran. Il cleric arch-conservativ da 63 onns é cun quai ufficinalmain successur da Hassan Ruhani, che na po betg pli sa preschentar suenter duas periodas d'uffizi. Tenor constituziun è Raisi il numer dus en il pajais. Ajatollah Ali Chamenei è il schef da stadi ed ha er l'ultim pled en tut ils reguards strategics.
Raisi, ch'è naschì il 1960 a Maschhad en il nord-ost da l'Iran, vala da grond’influenza entaifer il sistem islamic. El ha ina stretga relaziun cun Chamenei. Raisi ha lavurà passa trais decennis en l'autoritad da giustia. Il 2019 è el vegnì nominà sco schef da giustia.
En sia anteriura funcziun sco procuratur public saja el stà responsabel per numerusas arrestaziuns ed execuziuns da dissidents politics.
Reacziuns internaziunalas: Plirs pajais, p.ex. l'Aserbaidschan, la Tirchia, l'Arabia-Saudita e la Russia han offert al Iran lur agid per tschertgar persunas. Ultra da quai ha l'Uniun Europeica tenor atgnas indicaziuns suenter ina dumonda d'agid or da l’Iran activà ses servetsch da chartas da satellit per sustegnair la tschertga. Ed era l'emprim minister iracais Mohammed Shia' al-Sudani conceda al pievel iranais ed a la direcziun iranaisa da sustegnair.
L'Israel ch'è in grond inimi da l'Iran – n'è anc betg s'exprimì suenter la crudada da l'helicopter, cun il president a bord. Medias israelianas rapportan dentant, cun sa referir sin persunas or dal circul da la regenza – che l'Israel n'haja nagut da far cunter l'incident en l'Iran. Ed ins na quintia betg che la politica da la republica islamica cunter l'Israel sa midia. La suletta dumonda saja tgi che suondia al president iranais mort.
