Il squitsch sin il comité olimpic internaziunal crescha: Atletas ed atlets da la Russia e dal Belarus duain vegnir sclaus dals gieus olimpics da stad l’auter onn a Paris. Quai hajan pretendì 35 stadis, tranter auter er la Germania, l'Australia ed ils Stadis Unids ad ina conferenza online. Uschia rapporta quai ina ministra da sport da la Lituania envers l’agentura da novitads Reuters.
Nus pretendain da sclauder atlets ed atletas da la Russia e dal Belaruss, usche ditg che la guerra en l'Ucraina cuntinuescha.
Actualmain èn la Russia ed il Belarus gia sclaus da bleras concurrenzas da sport internaziunalas, per exempel en il tennis. Il comité olimpic internaziunal ponderescha da tuttina laschar far part atlets ed atletas dals dus stadis als gieus olimpics. Da sclauder sportists e sportistas pervia da lur pass u lur lieu da naschientscha violeschia il scumond da discriminaziun, ha il president dal comité Thomas Bach ditg.