L'anteriur defensur ed organisatur dal campiunadi mundial da ballape en la Germania 2006 è mort la dumengia, sco che sia famiglia ha communitgà.
Franz Beckenbauer, la legenda dal ballape da la Germania, è tranter auter daventà campiun mundial sco giugader, il 1974 e sco trenader il 1990. Sco junior è el vegnì tar l'FC Bayern München ed è daventà in dals ballapedists tudestg cun il pli grond success insumma. Cun Bayern München ha el tranter auter pudì festivar quatter titels da campiun naziunal.
Or da motivs da sanadad è Beckenbauer ils davos onns sa retratg pli e pli fitg da la publicitad. Il 2016 ha el survegnì trais bypass tar in'operaziun vi dal cor. Dapi in infarct d'egls è el ultra da quai stà tschorv sin in egl, sco quai ch'el ha tradì il 2022.
