La parti da Silvester illegala a Lieuron, en la Bretagne, è schliada tenor l'agentura da novitads AFP. Durant bunamain dus dis han 2'500 persunas festivà la midada da l'onn encunter tuttas reglas da corona. L'indriz da musica saja montà giu e las partizipantas ed ils partizipants bandunian il territori, scriva AFP vinavant.
Avant ha il ministeri da l'intern franzos clamà ad ina seduta da crisa. Singulas vuschs ord la politica èn s'exprimidas frustradas perquai che la polizia n'ha betg schlià pli baud la parti illegala.
Restricziuns
En Frantscha valan restricziuns da contact ed in scumond da sortida la notg tranter las 20:00 e las 06:00. Ultra da quai aveva la regenza cusseglià che da Silvester nua duajan betg dapli che sis persunas sa scuntrar a chasa.
