La tractanda d’ina meglra collavuraziun stoppia finalmain vegnir sisum las glistas da duers, ha ditg il vicechancelier tudestg envers la gasetta «Bild». L’investigaziun da terror stoppia survegnir la medem’impurtanza sco avant onns la liberaziun da bancas ni la crisa da la Grezia.
Evitar il svilup da ghettos
Dapi onns vegnia proclamà da meglierar il barat da datas, ma i vegnia lavurà vinavant senza midar insatge ed ils stadis na barattian betg datas, ha crititgà Gabriel.
Gabriel ha fatg attent ch’ils attentats da Paris e Brüssel na sajan betg vegnids commess d’immigrants. Ils terrorists sajan naschids e creschids si en Frantscha e Belgia. Quest fatg mussia ch’ins stoppia evitar ghettos sco quai ch’i saja il cas a Paris ed a Brüssel.
RR novitads 06:00