En il port da la citad da Piräus èn era oz puspè arrivads bun 1’800 fugitivs. Actualmain èn millis da fugitivs bloccads en la Grezia, perquai che la Macedonia lascha passar be paucas persunas per di. Quellas arrivan savens da l’Irac u da la Siria e viageschan vinavant vers l’Europa Centrala.
Capacitads èn a la limita
En la speranza da pudair viagiar vinavant vers il center da l'Europa han plirs millis migrants spetgà da la vart greca sut tendas e blatgas. Millis fugitivs sa chattan en viadi cun tuts meds da traffic pussaivels ed er a pe.
Ils centers grecs per laschar registrar, pliras hallas sco era ina plazza aviatica serrada ad Athen èn surchargiadas, rapporta la televisiun statala greca.
RR novitads 06:00