Ins haja chattà ina datoteca audio e pudì evaluar quella. Infurmaziuns detagliadas na possia el dentant betg dar ha ditg Remi Jouty da l’Uffizi per aviatica franzos durant ina conferenza a las medias. Be tant, la datoteca na dettia nagin scleriment pertge che l’aviun da la Germanwings è crudà. Plinavant ha Jouty detg che l’aviun saja stà sin curs tut normal fin las 10:30. Il davos signal da radar saja stà fitg datiers dal lieu nua che l’aviun è crudà.
Lavurs da salvament
![gruppa da salvament en la grippa tranter restanzas da l'aviun](https://www.rtr.ch/static/cms/images/960w/087f61.jpg)
L’emprim nodasgols da la Germanwings che ha registrà tut las ramurs e discurs en il cockpit è Paris. Il segund è anc sparì. Las forzas da salvament vulan uss chattar il segund nodasgols, quai ha in dals pilots ditg avant lieu a las agenturas da novitads. Pir suenter duai il transport da las baras cuntinuar.
L'aviun, cun 150 persunas a bord, era sin viadi da Barcelona a Düsseldorf cura ch'el è crudà giu en il sid da la Frantscha. Entant ha la societad aviatica Germanwings confermà che 72 da las unfrendas sajan da naziunalitad tudestga. Ulteriuras unfrendas derivan para da la Gronda Britannia, Danemarc, Australia, Israel, Mexico, Columbia, Argentina e Giapun.
Schefs da stadi han visità lieu da la disgrazia
La chanceliera tudestga Angela Merkel ha visità la regiun da l’accident da l’aviun da la Germanwings en las Alps franzosas. Communabel cun il president franzos François Hollande ed il primminister spagnol Mariano Rajoy ha Merkel commemorà da las unfrendas
RR novitads 11:00