En regiuns da crisa ha l'ovra d'agid per uffants Unicef dumbrà 59 milliuns giuvenils tranter 15 e 24 onns che na san ni leger ni scriver. Periclitadas sajan cunzunt mattatschas. Uschia èn tenor il studi dad Unicef en media 33% da las mattatschas e 24% dals mattatschs en las regiuns da crisa analfabets.
Las pli autas quotas da giuvens analfabets han la Nigeria (76%), il Tschad (69%), il Sudan dal Sid (68%) e la Republica Centralafricana (64%).
Fore discurra d'ina admoniziun
Per la manadra dad Unicef Henrietta Fore èn questas cifras in'admoniziun. Ellas mussian tge influenza tragica che crisas han sin la furmaziun d'uffants, sin lur futur e sin la stabilitad ed il creschament da lur sistem economic.
Furmaziun po crear u destruir pussaivladads per il futur d'in uffant. Igl è impurtant per tuts uffants, da survegnir uschè baud sco pussaivel la meglra furmaziun.
Mo 4% da l'agid umanitar vegn investì en furmaziun
Il pli grond problem è tenor l’Unicef ch’ils meds finanzials manchian. Ed er l'agid da l'exteriur en il champ da scolaziun saja moderà: Mo 4% da l’agid umanitar vegnia investì en la scolaziun dals uffants e dals giuvens en regiuns da conflict.
RR novitads 12:00