Sco segunda chombra ha il senat polac approvà la mesemna notg in midada dispitaivla da la lescha. Quella restrenscha drasticamain las pussaivladads da recurs da la Dretgira constituziunala.
Gronda maioritad en il parlament
Malgrà protests ed avertiments da l'opposiziun, da derschaders, da politichers da l'exteriur e da diesch-millis demonstrants, han 58 senaturs vuschà per la midada proponida da la regenza e mo 28 èn stads encunter. La chombra dals deputads aveva gia approvà il mardi la midada.
Dretgira uss senza funcziun
Spetgà vegn ch’il president da la Pologna signescha proximamain la lescha adattada. Uschia perda la Dretgira constituziunala per immediat la pussaivladad da curreger decisiuns dal parlament. Quel vegn dominà dapi curt da la partida «Dretg e giustia».
Critica da l'Uniun europeica
Avant la decisiun era la cumissiun da l'UE sa demussada preoccupada dal svilup en la Pologna. En ina brev aveva ella pretendì da suspender ed examinar la lescha dispitaivla.
Ed entant ha il president polac Andrzej Duda refusà la critica dal president dal parlament da l'Uniun europeica, Martin Schulz, i na dettia nagin culp da stadi en la Pologna. Quai che Schulz haja ditg saja surfatg, gie perfin offendent, ha ditg Duda al magazin tudestg «Der Spiegel».
RR Novitads 07:00 / 14:00