Exteriur - Papa Francestg deplorescha violenza en Sri Lanka

La seria d'attentats a Sri Lanka ha er sumbrivà las festivitads da Pasca en il Vatican. Il pontifex ha commemorà la dumengia da Pasca las unfrendas avant dieschmillis persunas a Roma. Pasca è la pli impurtanta festa per ils Cristians ed en sasez ina raschun per plaschair. I vegn numnadamain commemorà la levada da Jesus. La messa da Pasca la bun'ura è normalmain fitg festiva. La plazza dal dom da s. Peder è stada fullanada. Tenor indicaziuns dal Vatican sajan radund 70'000 persunas stadas là.

Commemorà ad unfrendas da guerra

En ses messadi per Pasca, avant ch'el dat la benedicziun «urbi et orbi», ha il papa discurrì da crisas e guerras sin l'entir mund. El ha er exprimì sia speranza sin ina fin da conflicts armads sin il mund. Tar il conflict en Siria saja qua il privel ch'ins vesa quel sco evident ed el vegnia a nus tuttina. El ha er accentuà quant impurtanta ch'ina schliaziun politica saja.

Las partidas da conflict en Libia ch'èn dapi dacurt puspè vid cumbatter, duain desister da violenza e puspè cumenzar in dialog. Ils responsabels en la Venezuela plinavant duain stoppian far fin cun la malgistadad sociala en il pajais ed er cun la violenza. Er sin il continent african ha el guardà, in continent che saja anc adina dominà da tensiuns, conflicts ed er d'extremissem che laschian enavos be malsegirezza, destrucziun e mort.

Avertì da malcuntentientscha e desperaziun

En la notg da Pasca ha Papa Francestg appellà als cartents da betg sa perder en malcuntentientscha e desperaziun. La Pasca fetschia nascher la speranza, uschia Papa Francestg. L’istorgia da Jesus mussia ch’i saja pussibel da passar da l’isolaziun a la cuminanza, da la desperaziun a la consolaziun e da la tema a la confidenza.

Papa Francestg terminescha oz las festivitads da Pasca cun ina messa sin la plazza da son Pieder. Suenter dat el anc la benedicziun dad «Urbi ed Orbi».

RR novitads 06:00