Tranter las bancas che han nizzegià il pli stedi questas firmas da chascha da brevs en il Panama tutgan las bancas svizras UBS, HSBC Svizra ed ina filiala da la Credit Suisse.
UBS e CS accentueschan la legalitad da lur fatschentas cun l'advocatura Mossack Fonseca. Ellas na prendan dentant betg directamain posiziun. L'UBS scriva ch'ella fetschia sias fatschentas entaifer las leschas e las regulaziuns.
Avain nagin interess vid daners che n'èn betg declerads a la taglia e che derivan ord activitads illegalas.
La Credit Suisse da sia vart renviescha a las leschas, reglas e prescripziuns vertentas. Ella sa tegnia vid questas, uschia scriva la CS envers il consorzi da schurnalists.
Finma examinescha
La surveglianza da finanzas federala Finma ha annunzià da vulair examinar sche e quant fitg las bancas svizras sajan involvidas en ils servetschs da Mossack Fonseca e sch'ellas hajan violà las ordinaziuns svizras.
Medias investigativas, la rait da retschertgas ICIJ, han scuvert ina gronda rait da firmas da chascha da brevs. Las datas èn vegnidas a la glisch suenter ch’in uschenumnà «Whistleblower» aveva surdà l’onn passà datas d‘ina firma d’advocatura or dal Panama a la gasetta tudestga «Süddeutsche Zeitung».
- Ils «Panama Papers» sa basan sin datas d'ina advocatura en il Panama.
- Las datas cumpiglian e-mails, datas da contos, documents uffizials, copias da pass sco er ulteriurs documents sur da 214’000 interpresas da chaschas da brevs.
- Tranter ils profitaders duajan er esser 12 schefs da stadis, ulteriurs politichers, stars dal mund da sport ed anc autras persunalitads.
- Plirs dals instituts da finanzas globalas èn domiciliadas en Svizra.
- Las datas eran vegnidas surdadas anonim a la «Süddeutsche Zeitung». Lezza ha alura surlavurà las datas communabel cun il consorzi internaziunal per il schurnalissem investigativ.
- Schurnalists en radund 80 pajais han fatg retschertgas ed elavurà radund 11,5 milliuns datas.
Las passa 200’000 firmas da chascha da brevs en il Panama vegnan surtut duvradas per zuppentar facultads avant las autoritads fiscalas, sco er per lavar daners dubius. En il focus vegnan uss blers politichers, ma er sportists e prominents (p.ex. il president russ Vladimir Putin, il primminister islandais Sigmundur David Gunnlaugsson, il ballapedist Lionel Messi u Michel Platini), dentant era persunas criminalas.
Involvids en las retschertgas eran era medias en Svizra, uschia il «Tagesanzeiger» e la «SonntagsZeitung». Il president dal Panama Juan Carlos Varela ha ditg ch’il stadi è pront da cooperar cumplainamain per sclerir il cas. La procura publica dal Panama ha annunzià da vulair cumenzar cun las inquisiziuns.
RR novitads 06:00/10:00