Tenor l'ambassadur ucranais tar l'ONU haja la Russia tratg ensemen radund 40'000 schuldads sin la pensinsla Crim. La Russia motivescha quels moviments da truppas cun acts da sabotascha che l’Ucraina duessa avair planisà sin la peninsla. L'ambassadur russ tar l'ONU ha ditg, ch'el speria che l'Ucraina saja prudenta avunda per deescalar la situaziun.
Ucraina ha mess truppas en prontezza da cumbat pli auta
![Mess lur truppas en la prontezza da cumbat la pli auta - Els dus sesan cun fatscha seriusa a maisa.](https://www.rtr.ch/static/cms/images/960w/a770af.jpg)
Sco reacziun sin las activitads russas aveva er l'Ucraina activà sias truppas. Pertutgadas sajan unitads militaras en il ost da l’Ucraina sco era en la regiun da la Crim. Tenor il stab general datti dapi la mesemna exercizis militars en il sid dal pajais, dentant sajan quels stads planisads.
La Russia aveva annectà la peninsla da la Crim l’on 2014 – suenter ina votaziun dal pievel e durant ils gieus olimpics da Sotschi.
RR novitads 06:00