Las leschas d'armas vegnian a sa midar en consequenza da las attatgas armadas sin duas moscheas il venderdi. Quai ha empermess la primministra Jacinda Ardern. L’attentader probabel haja acquistà il november avant dus onns ina permissiun da purtar armas.
Ins haja chattà tschintg armas – tranter quellas er duas mez automaticas – ch'el haja pudì cumprar illegalmain. En la Nova Zelanda po mintga burgais sur 16 onns acquistar in permiss d'armas, sch'el ha fatg in curs da segirezza.
Attentader supponì manà avant al derschader
Entant ha l'attentader probabel stuì sa responsar davant dretgira. Il derschader ha incriminà uffizialmain l'Australian da 28 onns per mazzament. L'inculpà n'ha tschentà nagina dumonda da vegnir laschà liber cunter cauziun e resta vinavant en arrest.
Ils 5 d'avrigl sto el danovamain sa preschentar davant dretgira. L'extremist da la dretga haja persequità l'audiziun senza emoziuns visiblas, uschia ils rapports. La polizia da la Nova Zelanda ha entant rinforzà las mesiras per proteger occurrenzas muslimas. Tar las mazzacras dad ier èn mortas almain 49 persunas.
RR novitads 10:00