Tenor indicaziuns dal Giapun saja la racheta sgulada durant 50 minutas e saja sa tschentada suenter 1000km en la Mar giapunaisa. Il militar sidcorean ha communitgà che la racheta saja sgulada vers l'ost.
La Corea dal Sid ha reagì cun agens exercizis militars sin il test da racheta nordcorean. Ensemen cun ils Stadis unids vul il stab general sidcorean examinar ils tests da rachetas nordcoreanas.
Indignaziun sin l'entir mund
Il pli giuven test da racheta da la Corea dal nord vilenta l'entir mund. Il secretari general da la NATO, Jens Stoltenberg, ha declerà a Brüssel ch'il test sutmineschia la segirtad la segirtad regiunala sco era internaziunala. L'Uniun europeica ha discurrì d'ina ulteriura cuntravenziun inacceptabla da la Corea dal Nord cunter obligaziuns internaziunalas.
Suenter plirs tests da rachetas dals davos mais èn las tensiuns tranter ils Stadis Unids e la Corea dal Nord creschidas marcantamain. Ils Stadis Unids da l'America han perquai smanatschà adina puspè d'agir a moda militara cunter Pjönjang.
Hawaii reintroducescha ils avertiments da sirena
Perquai ch'ins ha tema d'ina eventuala periclitaziun entras la Corea dal Nord reprenda il stadi federativ american Hawaii puspè ses avertiments da sirena pervi d'attatgas atomaras. La populaziun duai vegnir sensibilisada per in eventual seracass.
RR novitads 20.00+