Il pajais cun 54 milliuns abitants era per lung temp in dals pajais pli isolads en il mund. Suenter decennis sut dictatura militara è il stadi s’avert. Dapi l’onn passà vegn el manà da la purtadra dal premi nobel da pasch Aung San Suu Kyi. Ella era sur onns en arrest dal militar. Quel ha dentant anc uss ina u l’autra posiziun clav en ses cabinet.
Tenor il militar era l'aviun da viadi da la citad Myeik en la metropola Rangun cura ch'il contact è rut giu.
Chattads tocs en la mar
Bastiments ed aviuns èn sa mess a la tschertga da l’aviun sparì. Gia curt suenter las emprimas notizias tar l’aviun sparì ha cità l’agentura da novitads franzosa AFP in pledader da l’armada: Tenor quel haja in dals bastiments, ch’era partì a la tschertga da l’aviun, chattà en il sid-ost da Myanmar tocs da l’aviun en la mar.
Schuldada, lur confamigliars ed equippa eran a bord
Il schef da l’armada aveva annunzià gia pli adura, che a bord da l’aviun sa chattavan 106 schuldads e confamigliars e 14 comembers d’equippa. La gronda part dals passagiers sajan probabel commembers dal militar ch'èn staziunads en la regiun da costa.
Pauca speranza per ils passaschiers
Actualmain èn aviuns e bastiments en viadi per acziuns da retschertga u da salvament, las autoritads n’hajan tenor AFP dentant betg grondas speranzas per las persunas, ch’eran a bord da l’aviun.
RR novitads 15:00