La cuminanza internaziunala sustegna las inslas caribicas memia pauc. Quai en connex cun ils stemprads ch’han devastà las inslas per gronda part. Da quest avis è il secretari general da l’ONU Antonio Guterres. Surtut ha Guterres crititgà las reacziuns reservadas dals pajais donaturs. Quels stoppian esser pli generus – ha ditg Guterres a New York. La cuminanza saja obligada da porscher il maun als pajais insulars pitschens. Cunzunt quels sajan numnadamain confruntads cun las midadas dal clima inevitablas. Ils huricans «Harvey», «Irma» e «Maria» avevan furià en la Caribica ed ils Stadis Unids.
En connex cun ils gronds donns dals huricans en ils Stadis Unids duai il congress conceder 29 milliardas dollars. Quai ha pretendì il president american Donald Trump. Radund 13 milliardas dollars duajan vegnir duvradas per gidar directamain las unfrendas dals stemprads en il Texas, la Florida ed il Puerto Rico. Il rest dals daners duaja ir en in fond da catastrofas statal.
RR novitads 09:00