Il president saja destituì e la regenza schliada, ha ditg il general Godefroid Niyombare en in pled al radio indigen. Il president dal Burundi, Pierre Nkurunziza sa chatta actualmain tar in inscunter da crisa sur dal Burundi en il stadi vischin Tansania. Ultra da quai ha Niyombare annunzià da vulair instradar elecziuns novas.
Tumults dapi emnas
En il stadi da Burundi datti dapi la fin d’avrigl demonstraziuns per part era violentas cunter ina candidatura da president actual. Blers represchentants da l’opposiziun sajan vegni arrestads. Almain 20 persunas sajan mortas e blers sajan blessads. Ultra da quai sajan passa 50’000 persunas fugidas ord il pajais, scrivan las agenturas da novitads.
RR novitads 15:00