Exteriur - Dschihadist svizzer è vegnì arrestà dals Tircs
L'armada tirca ha arrestà ils ultims dis numerusas persunas che han vulì s'associar cun la milissa terroristica Stadi Islam en la Siria. Tranter ils arrestads sa chatta era in Svizzer, quai rapporta l'agentura da novitads taliana ANSA.
Ulteriurs arrestads èn Chinais sco era radund 300 Sirians. Sin squitsch dals stadis dal vest ha la Tirchia rinforzà ils ultims mais las controllas al cunfin cun la Siria. Dapi lura èn s'augmentadas las arrestaziuns sco era ils repatriaments da persunas da l'exteriur.
