Il dumber da persunas sparidas saja s'augmentà, suenter ch'ils cloms d'urgenza d'avant in'emna sajan vegnids evaluads, ha declerà il scherif da Butte County. I haja dà in caos extraordinari.
En pli è er il dumber da morts creschì en il nord dal stadi federativ sin 63 persunas, cunquai che set ulteriuras baras èn vegnidas chattadas en il decurs da la gievgia. En tut han ils fieus fin uss chaschunà almain 65 morts, quai èn tants sco anc mai tar in fieu en la California.
Fieus per part sut controlla
En il lieu bunamain ars dal tut Paradise han la gievgia tschients da gidanters en vestgids da protecziun e cun chauns spezialisads cuntinuà a tschertgar persunas sparidas en las ruinas da las chasas. Per identifitgar las restanzas terrestras han blers parents mess a disposiziun material da DNA. Bleras da las baras èn arsas uschè ferm, ch'ellas n'èn betg pli reconuschiblas.
Ils pumpiers han entant fatg progress cun stizzar ils fieus. Sco las autoritads han communitgà eran la gievgia 40% dals fieus en il nord dal pajais federativ sut controlla. En il sid da la California en vischinanza da Malibu, nua ch'ils fieus han chaschunà dus morts, èn entant 60% dals fieus sut controlla.
RR novitads 06:00