Ils 23 da zercladur 2016 ha lieu la votaziun istorica. Ils Brits e las Britas decidan, sch'els vulan restar u bandunar l'Uniun europeica. Il proxim di il resultat: 51.9% dals votants e da las votantas vulan bandunar l'UE. Dapi lura èn suandadas differentas votaziuns en il parlament, tractativas cun l'UE e grondas discussiuns.
La partida ch'avess stuì realisar la decisiun, pia il Brexit, n'è da la bell'entschatta betg stada da la medema opiniun co far quai. E lura saja cler, ch'i vegnia a dar ina situaziun betg survesaivla. E vinavant:
Questa votaziun han els gea vulì uschia.
Las malsegirezzas en il mument tutgan dentant tar ina democrazia, manegia Andreas Glaser. Quai sa movia anc tut en il rom da la democrazia britannica. Vinavant possia questa situaziun era dar schlantsch e novas schanzas per la democrazia.
Malsegirezzas dettia era tar las votaziuns en Svizra. Era là n'è la populaziun betg adina cuntenta co ina iniziativa acceptada vegn realisada. La differenza en congual cun la Gronda Britannia: En Svizra vegn votà pliras giadas l'onn, en Gronda Britannia mo darar.
«Spetgar e sperar»
La situaziun actuala na cuntenta dentant nagin propi – ni quels ch'han votà per il Brexit ni quels ch'èn stads cunter. Cun quai ch'i na dat en la Gronda Britannia nagin dretg da far iniziativas dal pievel, restia ad els mo da sperar u spetgar sin elecziuns novas.
RR Actualitad 17:00