Dieschmillis da «gilets jaunes» protesteschan tar radund 2’000 acziuns en tut la Frantscha cunter taglias pli autas sin carburants. «Gilets jaunes» – gilets mellens – vegnan ils demonstrants numnads pervi ch’els portan ils gilets mellens che mintga automobilist da l’UE ha da manar cun sai en l’auto.
Ils «gilets jaunes» han clamà – passa 283'000 èn vegnids
Tenor las autoritads sajan radund 283’000 persunas seguidas al clom dals «gilets jaunes» e sajan idas a protestar sin via – bloccond vias impurtantas, rondellas e staziuns dad enchaschar taxas da via.
En mira han ellas ils augments da taglias sin carburants che la regenza Macron planisescha. I sa tractia bain dad ina taglia ecologica che saja a favur da la societad, scriva l'agentura franzosa AFP; ma la malcuntentientscha saja pli generala ed i vegnia renfatschà a la regenza da betg avair en egl la realitad da blera glieud.
1 persuna è morta ed almain 229 èn vegnidas feridas
Durant ils protests hai dà differents incaps violents. Datiers da Grenoble è morta ina demonstranta tar ina bloccada sin la via cur ch’ina automobilista traplada era vegnida en panica.
En tut sajan vegnidas feridas almain 229 persunas – set dad ellas grevamain, communitgescha il ministeri da l'intern franzos la sonda suentermezdi. Almain 117 persunas sajan vegnidas arrestadas ed almain 73 prendidas en fermanza.
RR novitads 12:00++