Uschè ditg ch'ils terrorists conquistian regiuns en la Siria, na possian ins politicamain cuntanscher nagut, ha ditg Assad envers l'emettur da televisiun talian RAI.
Suenter la conferenza internaziunala davart la Siria aveva il minister da l'exteriur american John Kerry ditg ch'ins saja be anc paucas emnas davent da la pussaivladad per ina gronda midada en Siria.
Russia ha preschentà resoluziun
La Russia ha entant preschentà al cussegl da segirezza da las Naziuns Unidas ina resoluziun per cumbatter la milissa da terror Stadi Islamic. I sa tracta qua d'ina versiun actualisada cun la quala i vegnia reagì sin las attatgas a Paris e sin l'aviun da passagiers russ, han ditg diplomats.
Suenter ils attentats a Paris aveva er la Frantscha annunzià in tal sboz da resoluziun. Quel vegnia ad esser curt, ferm e cun in focus sin il cumbat encunter lur inimi communabel, uschia l'ambassadur franzos, François Delattre.