Trump ha discurrì d'ina crisa umanitara. Il shutdown – pia che las fatschentas da la regenza èn bloccadas parzialmain – saja sulettamain d'attribuir al fatg ch'ils democrats na veglian betg conceder las passa tschintg milliardas dollars per la segirtad da cunfin.
La raschun per quest shutdown è la finanziaziun d'in mir al cunfin cun il Mexico. Trump pretenda dal congress passa 5 milliardas dollars per bajegiar quel. Ils democrats na vulan però betg conceder tals daners.
Ina fin dal shutdown n'è betg en vista. Trump ha schizunt smanatschà da laschar per lung temp la situaziun da shutdown – fin ad onns.
Durant in shutdown è la regenza americana bloccada parzialmain. Blers uffizis restan serrads. Radund 800'000 collavuraturs da la regenza ston lavurar senza ch'els vegnan pajads u vegnan sfurzads da far vacanzas. Quest shutdown cuzza gia dapi passa duas emnas. Il pli lung shutdown ch'i ha dà en l'istorgia americana ha cuzzà 21 dis.
La presidenta democratica da la fracziun en la chasa dals represchentants, Nancy Pelosi, ha ditg en in agen pled ch'il president fabritgeschia ina situaziun da crisa e derasia tema. Trump stoppia chala da vulair tegnair il pievel american sco ostagis e puspè far che la regenza funcziunia.
Experts da immigraziun davart situaziun al cunfin
Trump circumscriva la situaziun al cunfin dal sid sco scenari da crisa. Auter interpreteschan experts d'immigraziun la situaziun. Uschia sajan ils ultims onns adina pli paucas persunas vegnidas prendidas en fermanza al cunfin, quai mussa ina survista da l'uffizi dal cunfin american. L'onn 2000 sajan quai stadas 1,6 milliuns, il 2010 radund 450'000 ed il 2018 radund 400'000 persunas che sajan vegnidas prendidas en fermanza.
Il dumber da persunas che dumondian per asil saja però creschì. Dal 2017 sin il 2018 schizunt è quai dumber creschì per dus terzs – da 56'000 sin 93'000 cas.
RR novitads 06:00